...
  • Zaur Ustacın Hərflər Haqqında Şeirləri
  • زائـــور اوستاج
  • ZAUR USTACIN HƏRFLƏR HAQQINDA ŞEİRLƏRİ
    A
    A ilə Ana deyə,
    Aləmə səs salırıq.
    Azərbaycan sözünə
    A ilə başlayırıq.
    * * *
    Ata, Anatək sözlər
    A-nın nəfis ilməsi
    A-dan Z-yə hərflər
    Allahın bir töhfəsi.

    A və N
    Baxın, Ana sözünə
    Hərfləri kim sayar?
    N- tək durub ortada
    Hər tərəfdə bir A var.

    N
    N, iyirminci hərfdir,
    Düşüb qabağa amma.
    Çünki, onu bilməsək,
    Yaza bilmərik ana.
    * * *
    N, nənəmin ninnisi,
    N, nənəmin nehrəsi,
    N, nənəmin şipşirin
    Noğul kimi nəvəsi.

    N və T
    Natiq tutdu Tofiqi
    Əlində tapançası.
    Tofiq təslim olmuşdu
    Yer yox idi qaçası.

    T
    Tuncay topu tulladı,
    Tutu, topu tut görək!
    Top-top mənə yaraşmaz,
    Mən tankçı olum gərək!
    * * *
    Tapançamı götürdüm,
    Tüfəngi də ver mənə.
    Tankı, topu sazlayım,
    Hücum edim düşmənə!

    Ə
    Əlifbam əlimdədir,
    Ə hərfi tanışdır.
    Gözümün önündəki
    Əlim Ə – lə başlayır.
    * * *
    Nənədə iki Ə var
    İki Ə – li nəvə də
    Babam Ə – dən küsəndə,
    Ona deyirəm dədə.

    L
    Lalə dostların yenə
    Topladı ətrafına,
    Axı, mən nənəmgilə
    Getmişdim Lənkərana!?
    * * *
    Orda bir ağac vardı,
    Meyvələri sapsarı.
    Leyla dadına baxdı,
    Büzüşdü dodaqları.

    I
    I – nı yazmaq asandı,
    Asan da yadda qalır.
    Kim tanımır, tanısın
    Lap çomağa oxşayır.

    I
    I hərfi sadədir
    Həm də asan yazılır.
    Onunla söz başlamır
    Bakı sözü qurtarır.

    R
    Raul əlində fırça,
    Yanaşdı molbertinə,
    Rənglər rəngə qarışdı,
    Oxşatdı raketinə.
    * * *
    Rəna görəndə rəsmi,
    Dedi, qəşəng rəndədi
    Hətta qanadı da var,
    Sanki, uçacaq indi...

    R
    Rahib Əkbərə
    Saymaq öyrədir.
    Bir, iki, …, dörd…
    Rəqəmdir deyir.
    * * *
    Əkbərsə gülür,
    Uğunur anlıq.
    Hansın unutdun?
    Niyə dayandıq?

    İ
    İlqar sevir, idmanı
    Hey hoppanır ip üstdən,
    İz axtarır bağçada,
    O, tez tapır itindən.

    B
    1 ilə 3 birləşib,
    Birlikdə “B” oldular.
    “Bakı” sözün başlayıb,
    “Kitab”ı qurtardılar.

    B
    Bahar, bayram sözündə
    B hamıdan birinci.
    Əlifbamda ikinci,
    “Bilik”də də birinci.

    YANVAR
    Yanvar birinci aydır,
    Uşaqlar sevir onu.
    Tətildə qartopu var,
    Kim sevməz bu oyunu?

    Y
    Yabını yəhərləyib,
    Yusif mindi, dalına
    Yellətdi, yorğa getsin
    Bərk yapışdı yalına.
    * * *
    Yabı heç tərpənmədi,
    Bir az əydi boynunu.
    Çəkəndə yüyənini
    Oynatdı quyruğunu.

    F
    Fuad Fəridlə
    Girmişdi bəhsə,
    Hansı daha tez
    Gələcək dərsə.

    FEVRAL
    Fevral, ikinci aydır.
    Qar yağır, sular donur.
    Çöldə ac qalan quşlar,
    Pəncərələrə qonur.

    U
    Uğur baxıb göylərə,
    Dedi, usta olacam!
    Uca bir qüllə tikib,
    Ulduzlara çatacam!

    D
    Dəvənin damı damdı,
    Durdu, damı dağıtdı.
    Dəvətikanı dərib,
    Dammayan dam düzəltdi.

    DAN
    Dan yerində
    Günəş doğur.
    Dan səmanın
    Al donudur.

    O
    O yumru hərfdir,
    Oxşayır yumurtaya.
    Yazmağı lap asandı,
    Qələmi kim fırlaya.

    ORXON
    Orxon çox qədim
    Sözdür bilirəm.
    Böyüyən kimi
    Öyrənməliyəm.

    X
    Çarpaz iki xətt çəkib,
    Adını “X” qoydular.
    Xəbər çatdı, xoruza
    Dedi, gecikib onlar.

    XƏZƏR
    Həm dənizdi, həm də göl
    Xəzər təkdi dünyada.
    Qoynunda bir şəhər var,
    O da ilkdi dünyada.

    Sual:
    Xəzər dənizində qəhrəman neftçilərimizin yaşayıb, işlədikləri şəhərciyin adı nədir?

    MART
    Yanvar, Fevral, Mart
    İlin ayları.
    Sevirəm Martı,
    Bol bayramları.

    Suallar:
    Mart neçənci aydır?
    Mart ayında hansı bayramlar var?
    Mart ayında daha hansı önəmli gün var?

    M
    Malik məktəbə
    Bu ildən gedir.
    Müəllim ona
    Ancaq beş verir.
    * * *
    Heç bir məsələ
    Deyil qaranlıq.
    Malik düşünür,
    Yalnız bir anlıq.

    K
    Kirpi kələmlə bir gün
    Gəldi kəllə-kəlləyə.
    Dedi, çəkil yolumdan!
    Kələm, güldü kirpiyə.
    * * *
    Sonra, gördü ciddidi
    Dedi, əkil başımdan!
    Bura mənim yerimdi,
    Bir də keçmə qarşımdan!
    * * *
    Kartofla, kök dözməyib,
    Yetişdilər köməyə.
    Kirpi başa düşdü ki,
    O, məcburdu dönməyə.

    K
    Əlifbamda bu hərfin
    Yeri tamam başqadır.
    Kartof, kələm bir başqa,
    Məktəb tamam başqadır.

    Tapşırıq:
    Kartof, kələm, məktəb sözlərin tələffüz etdikdə “K”
    hərfinin necə fərqli səsləndiyinə diqqət yetirməli.

    Q
    Qu quşu qurbağanı
    Gördü göl qırağında
    Qurbağa oxuyurdu,
    Kefində, damağında.
    * * *
    Qu dedi, quruldama,
    Xoşum gəlmir, qurbağa!
    Matı-qutu qurudu,
    Lap, karıxdı qurbağa.

    QIŞ
    Qarlı Qış gəlib qonaq,
    Çox sevinir uşaqlar.
    Qartopu oynayırlar,
    Sürüşürlər qoçaqlar.
    * * *
    Qaçayın kefi qaçıb,
    Bayaqdan hey düşünür.
    Quşlar indi ac qalıb,
    Pişiklər də üşüyür.

    E
    E darağa oxşayır,
    Dişi tökülüb, amma.
    Üçcə dişi qalıbdı,
    Onunla çox oynama!

    ELAN
    Etibarla Ehtiram
    Belə elan yazıblar:
    “Qaranquşlar itibdir,
    Yəqin yolu azıblar”

    Sual:
    Qaranquşlar nə vaxt gələcək?
    “Yolu azmaq” nə deməkdir?
    Başqa hansı anlamı var?

    S
    Saatsaz saatları,
    Aşıq sazı sazladı.
    Saatlar işləməyə,
    Aşıq sözə başladı.
    * * *
    Neçə saat durmadan,
    Aşıq söylədi, dastan.
    Saatsaz yuxuladı,
    Səs gəlmədi saatdan.

    SENTYABR
    Xoş gəldin, Sentyabr!
    İndi üzümüz gülər.
    Çantamız xoşbəxt olar,
    Kitab-dəftər sevinər!

    Ş
    Şamil şamları,
    Qoydu şamdana.
    Çərşənbə günü,
    Qalsın axşama.

    ŞEHÇİÇƏYİ
    Bir çiçək var, Şehçiçəyi,
    Cücüləri tutub “yeyir”.
    Belə maraqlı bilgini,
    Kitab oxuyanlar bilir.

    Tapşırıq:
    Şehçiçəyi haqqında məlumat topla.


    C
    Sancağımı bəzəyən
    Hilala bənzəyirsən!
    Azərbaycan sözünü
    Can ilə bəzəyirsən!
    * * *
    Ana da balasına
    Can deyə cavab verir.
    Cahu-cəlal sözünə
    C hərfi rəvac verir.

    CANAVAR
    Ya canavar, ya ayı,
    Ya kəpənək, ya arı,
    Hərəsi bir canlıdır,
    Biz qoruyaq onları.

    V
    Vaqifin bir vərdişi
    Hər şeydən vacib idi,
    Vaqonda da, evdə də
    Mütləq var-gəl edirdi.

    Suallar:
    Vaqon nədir?
    Var-gəl etmək nədir?


    VAHİD
    (Şəhid Abbasov Vahidin xatirəsinə)
    Vahid getdi əsgərə,
    Həmişə dedi: - “Oldu!”
    Postunu tərk etmədi,
    Vətənçün şəhid oldu.

    Ç
    Ç hərfi çobanla
    Lap çoxdan dostluq edir,
    Ç - li çomaq həmişə
    Çobanın əlindədir.
    * * *
    Çəməndəki keçisi,
    Ç - li çayırı çeynər,
    Arxacdakı çəpişlər
    Çeşmələrdən su içər.
    * * *
    Ç - li alaçıq, çadır
    Çöldə çobanın evi,
    Çoban yaman çox sevir
    Ona görə bu hərfi!

    ÇƏNLİBEL
    Koroğlunun oylağıdır,
    Çənli, dumanlı Çənlibel.
    Mərd oğullar oymağıdır,
    Dağlar qoynunda Çənlibel.

    Z
    Zanbağı görən kimi,
    Zümrüd dedi, Zeynəbə
    Paxıl deyilsən əgər,
    Zanbağını ver mənə.
    * * *
    Zəhra qarışdı işə,
    Sonra dedi, bu qədər,
    Tənbəl deyilsən əgər,
    Zəhmət çək, özün becər!

    ZƏNGƏZUR
    Zəhmətkeş babaların
    Vətənidir Zəngəzur.
    Əsir düşən torpağım,
    Vətənimdir Zəngəzur!

    Ö
    Çıxıb qunun önünə
    Özünü öydü ördək,
    Göldə məndən gözəli
    Varmı, bir deyin görək!?

    ÖMƏR
    Söhbət edirdi,
    Ömərlə Əsmər.
    Ömər dedi ki,
    Olacam əsgər!

    Sual:
    Sən böyüyəndə kim olacaqsan?

    Ü
    Üzdüm üzümü,
    Üzdüm, özümə!
    İstəyirsənsə,
    Gəl, üz özünə!
    * * *
    Üzüm qurusu
    Üzümdən dadlı,
    Qaldıqca olur
    Daha faydalı!

    ÜLKƏR
    Ülkər adıyla
    Öyünür hər dəm.
    Mən daha parlaq,
    Zərif, inciyəm!
    * * *
    Günəşsə, susur,
    Danışmırdı heç.
    Bacı, bacıyla
    Dalaşarmı heç!?

    Sual:
    Ülkər nəyə işarə edir?
    Ülkər, Günəş adları haradan götürülüb?

    P
    Paşa, əlində maşa
    Hücum çəkdi pişiyə,
    Burda pişik özüməm
    Haydı çıxdın eşiyə!

    PALTAR
    Səliqəli geyinir,
    Məktəbdə hər bir uşaq.
    Pencək, palto geyirik,
    Başa qoyuruq papaq.

    G
    Hər Günəşin doğması
    Yeni günü başlayır,
    Günəş qürub edəndə
    Demək, gün başa çatır.
    * * *
    Günəş özü möcüzə
    Sirr dolu varlığıyla,
    “Bir gün” isə mesajdır
    Dünyaya, insanlığa!

    GÜZ
    Hamımız Payız deyir,
    Əslində adı Güzdü.
    Ona Payız deyənə
    Payız dodağın büzdü.

    H
    Həsən çıxdı hasara,
    Nə yaman hündür imiş.
    Hop eləyib, hoppandı,
    Hündürdən hündür imiş!

    HÜMBƏT
    Hümbətin beş yaşı var,
    Yaman hazırcavabdır.
    Həvəsi var yazmağa,
    Oxumaqda qoçaqdır.

    Ğ
    Qarğa ilə qurbağa
    Getdilər qonaqlığa,
    Sağsağanın toyuydu
    Düşmüşdülər bolluğa.

    QOĞAL
    Nağı maraqla baxdı,
    Vitrindəki qoğala.
    Nəsə heç oxşamırdı,
    Nağıldakı Qoğala.

    J
    Jalə aldı jurnalı
    Baba, ver baxacağam!
    Böyüyəndə sənintək
    Jurnalist olacağam!

    JALƏ
    Jalə, Damla və Şəbnəm
    Yola getmirdi heç vaxt.
    Bir gün Yağmur dillənib,
    Hamısını qoydu mat.

    Sual:
    “Mat qoymaq” deyəndə nə başa düşürsünüz?

    Müəllif, Zaur Ustac
    "Güllünün şeirləri" kitabından bir bölüm





    • aprel 2022, زائـــور ا.

  • 127
Belə Ayrılıq Olmur

Dəhnəli Məmməd Hacızadə

Dərddi dərdə calanan, hey üst-üstə qalanan. Baxma ki ortalıqda iztirabdı dolanan, . Dözmərəm göz yaşına, qəm dolu baxışına. Qəlbimdəsən getsəm də, dünyanın o......

Ağrının ssenarisi - (psixoloji-fəlsəfi janrda hekayə)

Tural İsmayılov

Gecənin sükutu mürəkkəb qurumamış vərəqlərimin üzərinə ağır bir duman kimi çökürdü. Pəncərənin önündə dayanıb, uzaqda, qaranlığın içində batan şəhərin işıqlarına baxırdım. Masamın üzərində on birinci......

Daha Səsləməyir Dan Yeri Bizi

Dəhnəli Məmməd Hacızadə

Göydə ay,ulduzlar yerdə sən və mən, Bir onlar oyaqdır, bir də, sən və mən. Qapılıb gecələr xoş xəyallara, Onlar bizə baxar, biz də onlara. Qalardı......

Ağ dumanın içindəki görən kor (fəlsəfi hekayə)

Tural İsmayılov

Atam deyirdi ki, dünyanı görmək üçün göz lazımdır, mən isə indi buna şübhə edirəm. O kitabı – vərəqləri künclərindən didilmiş, cildi günəşdən solmuş o qəribə......

Zaur Ustac - Zenitdəki Zenitçi

زائـــور اوستاج

Zenitdəki Zenitçi (oçerk) Azərbaycan xalqının qəhrəmanlıq salnaməsi yüz illər boyu Vətən uğrunda canından keçən igid oğulların adı ilə zəngin olmuşdur. Bu qəhrəmanlar yalnız bir ailənin......

Sona İsmayılova – Zakir Kaya’nın Medya ve Yayıncılık Çalışmaları

زائـــور اوستاج

Röportaj Editör Girişi Dr.profesor Zakir Kaya, Türkiye merkezli araştırmacı gazeteci, yazar olarak medya, yayıncılık ve edebiyat......

Araşdırmaçı jurnalist Zakir Kaya: Media, Ədəbiyyat və Müstəqil Düşüncənin Kəsişm...

زائـــور اوستاج

Müsahibə Mətni Müasir mediada sürət, görünürlük və rəqəmsal intensivlik artdıqca, məzmun istehsalının keyfiyyəti və......

Zaur Ustac - Mən

زائـــور اوستاج

Mən “Sizin yanınızda oturmaq istəyirəm” … (Qəndab – Ara-sor məni) Hər gün oyananda səhər mehində, Sübhün şəfəqində, danındayam mən. Telinin cığasın pozan küləyəm, Hər zaman......

Zaur Ustac - Aşiq gecələr

زائـــور اوستاج

Aşiq Gecələr (Qəndab – Aşiq gecələr) O zülmət gecənə şam olum, gülüm, O gül cəmalına aşiq gecələr! “İşıldaquş”ların işığı vecsiz, Əriyən mumlara aşiq gecələr! Pərvanə......

Abşeron təhsilində sözün və yaddaşın böyük bayramı

زائـــور اوستاج

Abşeron-Xızı Regional Təhsil İdarəsi müdiri hörmətli Ilhamə xanım Abdullayevanın dəstəyi ilə Xırdalan şəhər 8 nömrəli tam orta ümumtəhsil......